വാരാപ്പുഴ കസ്റ്റഡി മരണം സിബിഐക്ക് വിടണം;പ്രതിപക്ഷ നേതാവ് നിരാഹാര സമരത്തിന്
കോട്ടയം: വാരാപ്പുഴയില്‍ പൊലീസ് കസ്റ്റഡിയില്‍ ശ്രീജിത്ത് കൊല്ലപ്പെട്ട സംഭവത്തില്‍ സി.ബി.ഐ അന്വേഷണം വേണമെന്ന് കെ.പി.സി.സി പ്രസിഡന്‍റ് എം.എം ഹസന്‍.പോലീസ് കസ്റ്റഡിയില്‍ ശ്രീജിത്ത് മരിക്കാനിടയായ സംഭവം സിബിഐ അന്വേഷിക്കണമെന്ന് ആവശ്യപ്പെട്ട് പ്രതിപക്ഷ നേതാവ് രമേശ് ചെന്നിത്തല നിരാഹാര സമരം നടത്തുമെന്ന് കെപിസിസി അധ്യക്ഷന്‍ എം.എം. ഹസന്‍ പറഞ്ഞു. എറണാകുളത്ത് തിങ്കളാഴ്ച രാവിലെ പത്ത് മുതല്‍ ചൊവ്വാഴ്ച രാവിലെ പത്ത് വരെയാണ് നിരാഹാരം സമരം. സംഭവത്തില്‍ ആലുവ റൂറല്‍ എസ്പി എ.വി. ജോര്‍ജിനെ സസ്പെന്‍ഡു ചെയ്യണമെന്നും ഹസന്‍ കോട്ടയത്ത് ആവശ്യപ്പെട്ടു.ചെന്നിത്തലക്കൊപ്പം മറ്റ് യു.ഡി.എഫ് നേതാക്കളും ഉപവാസമിരിക്കും.
യുഡിഎഫിലേക്ക് കെ.എം. മാണി തിരിച്ചുവന്നാല്‍ സ്വീകരിക്കും. ഇക്കാര്യത്തില്‍ മാണി മറുപടി പറയട്ടെയെന്നും അദ്ദേഹം പറഞ്ഞു. കോണ്‍ഗ്രസ് നടത്തുന്ന ജനമോചന യാത്ര സംബന്ധിച്ച വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.
