അബൂദബി ‘ടാലന്റോളജി’ മത്സരത്തിന് സമാപനം
അബൂദബി: അബൂദബി മുശ്രിഫ് മാളിൽ ഒരു മാസം നീണ്ടുനിന്ന ടാലന്റ് കോമ്പറ്റീഷനായ ‘ടാലന്റോളജി’ മത്സരത്തിന് സമാപനമായി. കുട്ടികൾക്കും മുതിർന്നവർക്കുമായി നടന്ന മത്സരങ്ങളിൽ അയ്യായിരത്തിന് മുകളിൽ ലഭിച്ച വോട്ടുകളോടെ പാരീസ് ആഷ്ലി, എഡ്ഡി ക്രൂ എന്നിവരാണ് വിജയികളായത്.
ഒരുമാസം നീണ്ടുനിന്ന മത്സരത്തിൽ ഓൺലൈൻ വോട്ടെടുപ്പിലൂടെയാണ്‌ വിജയികളെ പ്രഖ്യാപിച്ചത്. അയ്യായിരത്തോളം പേർ പങ്കെടുത്ത സമാപന ചടങ്ങിൽ ലുലുഗ്രൂപ്പ് ഇൻറർനാഷനൽ എക്സിക്യൂട്ടീവ് ഡയറക്ടർ എം.എ.അഷ്റഫ് അലി മുഖ്യാതിഥിയായിരുന്നു. ലൈൻ ഇൻവെസ്റ്റ്മെന്റ്സ് ഡയറക്ടർ വാജിബ് അൽഖൂറി, മുശ്രിഫ് മാൾ ജനറൽ മാനേജർ അരവിന്ദ് രവി പാലോട് എന്നിവർ സമാപന ചടങ്ങിൽ പങ്കെടുത്തു.
ഉപഭോക്താവിന് ‘ഷോപ്പിങ്ങിനൊപ്പം വിനോദവും’ എന്നതാണ് ടാലന്റ് കോമ്പറ്റീഷൻ കൊണ്ട് ലക്ഷ്യമാക്കുന്നതെന്ന് മാൾ ജനറൽ മാനേജർ അരവിന്ദ് രവി അറിയിച്ചു. അബൂദബിയിലെ ഏറ്റവും വലിയ ടാലൻറ് മത്സരമാണ് ടാലന്റോളജി. ഈ വർഷം പതിനായിരത്തിലധികം മത്സരാർത്ഥികളിൽ നിന്നാണ് വിജയികളെ കണ്ടെത്തിയത്.
