തലശേരിയിൽ സിപിഎം പ്രവര്ത്തകനായ യുവാവ് ദുരൂഹ സാഹചര്യത്തിൽ മരിച്ച നിലയിൽ
കണ്ണൂർ തലശ്ശേരി കുട്ടിമാക്കൂലില് ദുരൂഹ സാഹചര്യത്തില് യുവാവിനെ വീട്ടിനുള്ളില് മരിച്ച നിലയില് കണ്ടെത്തി. സിപിഎം പ്രവര്ത്തകനായ കുട്ടിമാക്കൂല് ശാന്ത ഭവനില് പച്ച സുധീര് എന്ന സുധീറിനെനെയാണ് വീടിന്റെ ഹാളില് വായില് നിന്നും രക്തം വാര്ന്ന് മരിച്ച നിലയില് കണ്ടെത്തിയത്. ഓട്ടോറിക്ഷ ഡ്രൈവറായ സഹോദരന് രതീഷ് ജോലി കഴിഞ്ഞ് വീട്ടിലെത്തിയപ്പോഴാണ് വീട്ടിനുള്ളില് മൃതദേഹം കാണപ്പെട്ടത്.
സിനിമ ലൊക്കേഷനുകളിലേക്ക് ഫര്ണിച്ചറുകള് നിര്മ്മിച്ചു നല്കലായിരുന്നു സുധീറിന്റെ തൊഴില്. മൃതദേഹം ടൗണ് പോലീസ് ഇന്ക്വസ്റ്റ് നടത്തിയ ശേഷം പോസ്റ്റ്മോര്ട്ടത്തിനായി ജനറല് ആശുപത്രി മോര്ച്ചറിയിലേക്ക് മാറ്റി. അവിവാഹിതനാണ്. കൊലപാതകമാണോ എന്ന സംശയമുള്ളതിനാൽ പോലീസ് അന്വേഷണം തുടങ്ങി.