ടെസ്റ്റ് റാങ്കിങില്‍ കൊഹ്‍ലി അഞ്ചാമത്: ടീം റാങ്കിങ്ങിൽ ഇന്ത്യ ഒന്നാം സ്ഥാനത്ത്
22 November 2017
ഏകദിനത്തിലും ട്വന്റി20യിലും ഒന്നാം നമ്പർ ബാറ്റ്സ്മാനായ ഇന്ത്യൻ നായകൻ വിരാട് കൊഹ്‍ലി ഐസിസി ടെസ്റ്റ് ബാറ്റിങ് റാങ്കിങ്ങിൽ അഞ്ചാം സ്ഥാനത്തേക്കുയർന്നു. ശ്രീലങ്കക്കെതിരായ ടെസ്റ്റ് പരമ്പരയിലെ ആദ്യ മത്സരത്തിലെ സെഞ്ച്വറി പ്രകടനത്തിനു പിന്നാലെയാണിത്. നേരത്തേ ആറാം സ്ഥാനത്തായിരുന്ന കൊഹ്‍ലി ആസ്ട്രേലിയയുടെ ഡേവിഡ് വാർണറെ പിന്തള്ളിയാണ് അഞ്ചിലെത്തിയത്.
ചേതേശ്വർ പുജാര നാലാം സ്ഥാനത്തുണ്ട്. ആസ്ട്രേലിയൻ നായകൻ സ്റ്റീവ് സ്മിത്താണ് ഒന്നാം സ്ഥാനത്ത്. ഇംഗ്ലണ്ട് നായകൻ ജോ റൂട്ട്, ന്യൂസിലാൻഡ് താരം കെയ്ൻ വില്യംസൺ എന്നിവരാണ് രണ്ടും മൂന്നും സ്ഥാനത്തുള്ളത്. ബൗളർമാരിൽ ഇന്ത്യയുടെ രവീന്ദ്ര ജഡേജ മൂന്നാം സ്ഥാനത്തേക്ക് ഇറങ്ങി. ടീം റാങ്കിങ്ങിൽ ഇന്ത്യ 125 പോയിന്റോടെ ഒന്നാം സ്ഥാനത്ത് തുടരുകയാണ്. ദക്ഷിണാഫ്രിക്കയാണ് (111) രണ്ടാം സ്ഥാനത്ത്.
