ദിലീപിനെതിരെ പുതിയ തെളിവുകളുമായി കുറ്റപത്രം തയ്യാറായി: താരത്തെ കൂടുതല് കാലം അഴിയെണ്ണിക്കാനുള്ള ശ്രമത്തില് അന്വേഷണ സംഘം
നടിയെ തട്ടിക്കൊണ്ടു പോയി ആക്രമിച്ച കേസിലെ ഗൂഢാലോചനാക്കുറ്റത്തിന് അറസ്റ്റിലായ നടന് ദിലീപിനെതിരെയുളള കുറ്റപത്രം തയ്യാറായി. ഇന്നു കുറ്റപത്രം സമര്പ്പിക്കാനാണു പൊലീസ് തീരുമാനിച്ചതെങ്കിലും മജിസ്ട്രേട്ട് അവധിയായതിനാല് ദിവസം മാറ്റുകയായിരുന്നു.
നിയമവിദഗ്ധരും മുതിര്ന്ന പൊലീസ് ഉദ്യോഗസ്ഥരും പങ്കെടുക്കുന്ന യോഗത്തിനു ശേഷം അടുത്ത ദിവസങ്ങളില് തന്നെ പ്രത്യേക അന്വേഷണ സംഘം കോടതിയില് കുറ്റപത്രം സമര്പ്പിക്കും. ഇതുവരെ പൊലീസ് വെളിപ്പെടുത്താത്ത വിവരങ്ങളും കുറ്റപത്രത്തിലുണ്ടെന്നാണു സൂചന.
പ്രതികളുടെ ജാമ്യഹര്ജി പരിഗണിക്കുന്ന വേളകളില് മുദ്രവച്ച കവറില് കോടതിയില് നേരിട്ടു സമര്പ്പിച്ചിരുന്ന വിവരങ്ങളാണിത്.
കൂട്ട മാനഭംഗം, ഗൂഢാലോചന, തട്ടിക്കൊണ്ടുപോകല്, തെളിവ് നശിപ്പിക്കല്, പ്രതിയെ സംരക്ഷിക്കല്, തൊണ്ടി മുതല് സൂക്ഷിക്കല്, ഭീഷണി, അന്യായമായി തടങ്കലില് വെയ്ക്കല് എന്നീ വകുപ്പുകളാണ് ദിലീപിനെതിരെ ചുമത്തുന്നത്.
സമീപകാലത്തു കേരള പൊലീസ് തയ്യാറാക്കിയ ഏറ്റവും സമഗ്രവും സൂക്ഷ്മവുമായ കുറ്റപത്രമാണിതെന്ന് അന്വേഷണ സംഘത്തിലെ മുതിര്ന്ന ഉദ്യോഗസ്ഥന് പറഞ്ഞു. കേസിന്റെ പ്രാധാന്യവും പ്രതികള് സാക്ഷികളെ സ്വാധീനിക്കാനും ഭീഷണിപ്പെടുത്താനുമുള്ള സാഹചര്യവും ചൂണ്ടിക്കാട്ടി വിചാരണ വേഗത്തില് പൂര്ത്തിയാക്കാന് പ്രത്യേക കോടതിയെ നിയോഗിക്കണമെന്ന ശുപാര്ശയും സര്ക്കാരിനു മുന്പാകെ ഡിജിപി സമര്പ്പിക്കും