നിലപാട് കർക്കശമാക്കി സിപിഎം; കോണ്ഗ്രസ്സിനോട് കൈ കോർക്കില്ല
ന്യൂഡൽഹി: കോണ്ഗ്രസ് ബന്ധം വേണ്ടെന്ന നിലപാടിലുറച്ചു സിപിഎം പൊളിറ്റ് ബ്യൂറോ. കോണ്ഗ്രസ് ബന്ധം വേണ്ടെന്ന രാഷ്ട്രീയ പ്രമേയത്തിന്റെ രൂപരേഖ കേന്ദ്രകമ്മിറ്റിയിൽ വയ്ക്കാൻ സിപിഎം തീരുമാനിച്ചു. തിങ്കളാഴ്ച ചേർന്ന സിപിഎം പൊളിറ്റ് ബ്യൂറോ യോഗത്തിലാണ് ഇതു സംബന്ധിച്ചു തീരുമാനം കൈക്കൊണ്ടത്.
രാജ്യത്തെ മാറിയ രാഷ്ട്രീയ സാഹചര്യത്തിൽ ബിജെപിയോടും കോണ്ഗ്രസിനോടും തുല്യ അകലമെന്ന അടവുനയം മാറ്റണമെന്ന വാദം പൊളിറ്റ് ബ്യൂറോ തള്ളി. കഴിഞ്ഞ പിബി യോഗം വിഷയം ചർച്ച ചെയ്തെങ്കിലും വലിയ തർക്കങ്ങൾക്കൊടുവിൽ കേന്ദ്രകമ്മിറ്റിക്കു വിടാൻ ധാരണയായിരുന്നെങ്കിലും തിങ്കളാഴ്ചത്തെ പിബിയിൽ കോണ്ഗ്രസ് ബന്ധം വേണ്ടെന്ന നിലപാടിലേക്കു സിപിഎം എത്തുകയായിരുന്നു.
കോണ്ഗ്രസിനോടുള്ള ബന്ധത്തിൽ മാറ്റം വരുത്തണമെന്ന് പാർട്ടി ജനറൽ സെക്രട്ടറി സീതാറാം യെച്ചൂരി മുന്പ് വാദിച്ചിരുന്നെങ്കിലും പ്രകാശ് കാരാട്ട് പക്ഷം ശക്തമായി എതിർത്തിരുന്നു. ഈ വാദത്തിനു പിബിയിലെ പ്രബല വിഭാഗമായ കേരളഘടകം പൂർണ പിന്തുണ നൽകി.