ഇന്നത്തെ പരീക്ഷകൾ എല്ലാം മാറ്റി: സ്കൂളുകൾക്കും കോളേജുകൾക്കും അവധി
കാലിക്കറ്റ്, മഹാത്മാഗാന്ധി, കണ്ണൂർ, കുസാറ്റ്, ആരോഗ്യ സർവകലാശാലകൾ ഇന്ന് നടത്താനിരുന്ന എല്ലാ പരീക്ഷകളും മാറ്റി. സംസ്ഥാന സർക്കാർ വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ച സാഹചര്യത്തിലാണിത്. പുതിയ പരീക്ഷാ തീയതി പിന്നീട് അറിയിക്കുമെന്ന് പരീക്ഷാ കണ്ട്രോളർ അറിയിച്ചു.
സംസ്ഥാനത്തെ എല്ലാ വിദ്യാഭ്യാസ സ്ഥാപനങ്ങൾക്കും ഇന്ന് അവധി പ്രഖ്യാപിച്ച് പൊതുവിദ്യാഭ്യാസ സെക്രട്ടറി ഇന്നലെ ഉത്തരവിറക്കിയിരുന്നു. പ്രഫഷണൽ കോളജ് ഉൾപ്പെടെയുള്ള വിദ്യാഭ്യാസ സ്ഥാപനങ്ങൾക്ക് അവധി ബാധകമാണ്.
സംസ്ഥാനത്ത് പരക്കേ കനത്ത മഴ പെയ്യുന്ന സാഹചര്യത്തില് മുഖ്യമന്ത്രി പിണറായി വിജയന് ജാഗ്രതാ നിര്ദേശം നല്കി. പോലീസ്, ഫയര്ഫോഴ്സ്, റവന്യൂ, ദുരന്ത നിവാരണ സേന എന്നിവയ്ക്കാണ് നിര്ദേശം നല്കിയത്. സംസ്ഥാന പോലീസ് മേധാവി ജില്ലാ പോലീസ് മേധാവിമാര്ക്കും ജാഗ്രതാ നിര്ദേശം നല്കിയിട്ടുണ്ട്.
സംസ്ഥാനത്തെങ്ങും അതിശക്തമായ മഴയാണ് അനുഭവപ്പെടുന്നത്. ഉരുള് പൊട്ടലും മണ്ണിടിച്ചിലും വ്യാപകമായ സാഹചര്യത്തില് ഉയര്ന്ന പ്രദേശങ്ങളില് വിനോദ സഞ്ചാരത്തിനായി പോകുന്നവര്ക്ക് ശക്തമായ മുന്നറിയിപ്പാണ് നല്കിയിരിക്കുന്നത്.