ദിലീപിനെ പിന്തുണച്ച് ടോമിച്ചന്‍ മുളകുപാടം : ‘അവരുടെ ലക്ഷ്യം ദിലീപിന്റെ തകര്‍ച്ച മാത്രമല്ല , രാമലീലയും’
കൊച്ചി : യുവനടിയെ ആക്രമിച്ച സംഭവത്തില്‍ ആരോപണവിധേയനായ നടന്‍ ദിലീപിനെ പിന്തുണച്ച് നിര്‍മ്മാതാവ് ടോമിച്ചന്‍ മുളകുപാടം.സംഭവത്തില്‍ ദിലീപിനെ കരുവാക്കുകയെന്നതിനപ്പുറം പുതിയ ചിത്രം രാമലീലയെ തകര്‍ക്കുകയെന്ന ലക്ഷ്യം ഇതിനു പിന്നില്‍ പ്രവര്‍ത്തിക്കുന്നവര്‍ക്കുണ്ട്.ദിലീപിനെ തനിക്ക് വളരെ നാളത്തെ പരിചയമുണ്ട്. രാമലീലയുടെ ഡേറ്റ് പ്രഖ്യാപിച്ചതിനു ശേഷമാണ് കുതന്ത്രങ്ങള്‍ മെനയുന്നവര്‍ പിന്നെയും സജീവമായി രംഗത്തെത്തിയതെന്നും അദ്ദേഹം പറഞ്ഞു. തന്റെ ഫേയ്‌സ്ുക്ക് പോസ്റ്റിലൂടെയാണ് ടോമിച്ചന്‍ മുളകുപാടം ഇക്കാര്യങ്ങള്‍ തുറന്നു പറഞ്ഞത്.
ഫെയ്‌സ്ബുക്ക് പോസ്റ്റ്
ഫെയ്‌സ്ബുക്ക് വളരെയേറെ വേദനയോടെയാണ് ഇതെഴുതുന്നത്. വളരെയേറെ നാളുകളായി പരിചയമുള്ള ദിലീപ് എന്ന നടനെതിരെയും ഞങ്ങള്‍ ഒരുമിക്കുന്ന രാമലീല എന്ന ചിത്രത്തിനെതിരെയും നടക്കുന്ന പ്രവര്‍ത്തനങ്ങള്‍ വേദനാജനകമാണ്. രാമലീലയുടെ റിലീസ് ഡേറ്റ് പ്രഖ്യാപിച്ചതിനുശേഷമാണ് കുതന്ത്രങ്ങള്‍ മെനയുന്നവര്‍ വീണ്ടും സജീവമായതെന്നതിനാല്‍ ഒന്നുറപ്പിക്കാം,അവരുടെ ലക്ഷ്യം ദിലീപ് മാത്രമല്ല രാമലീലയും കൂടിയാണെന്ന് വ്യക്തം. നൂറുക്കണക്കിന് ആളുകളുടെ സ്വപ്നവും പ്രയത്നങ്ങളും രാമലീല എന്ന ചിത്രമായി തീയറ്ററുകളില്‍ എത്തിക്കാനുള്ള ശ്രമത്തിലാണ്
ഞാനടക്കമുള്ളവര്‍.
നല്ലൊരു മുതല്‍മുടക്കില്‍ അരുണ്‍ ഗോപിയെന്ന നവാഗത സംവിധായകന്റെ കൂടി ഒരു സ്വപ്നമാണിത്. എഴുപതിലധികം ദിവസത്തെ ഷൂട്ടിങ്ങും പോസ്റ്റ് പ്രൊഡക്ഷന്‍ വര്‍ക്കുകളുമായി രാമലീലക്ക് പിന്നില്‍ പ്രവര്‍ത്തിക്കുന്ന ഓരോരുത്തര്‍ക്കും വേദനയുളവാക്കുന്ന ഒരു കാര്യമാണ് ചിത്രത്തെ തകര്‍ക്കാന്‍ ചിലര്‍ നടത്തുന്ന നാണംകെട്ട പ്രവൃത്തികള്‍.
അതിലേറെ വേദനയേകുന്ന ഒന്നാണ് ദിലീപ് എന്ന നടനെതിരെ നടക്കുന്ന ഗൂഢാലോചനകള്‍. നുണപരിശോധനക്കോ മറ്റെന്ത് ടെസ്റ്റിനോ വേണമെങ്കിലും തയ്യാറായ ആ നടനെ തകര്‍ക്കാന്‍ ശ്രമിക്കുന്ന .ഓരോരുത്തനും ഒന്നോര്‍ക്കുക. അദ്ദേഹം ജനപ്രിയനായത് കഠിനാധ്വാനവും പ്രേക്ഷകപിന്തുണയും കൊണ്ടാണ്. അതിനിയും തുടരുക തന്നെ ചെയ്യും. പ്രേക്ഷകരായ നിങ്ങളുടെ പിന്തുണ എന്നും പ്രതീക്ഷിക്കുന്നു.
