യുവതിയെ പീഡിപ്പിച്ചെന്ന പരാതിയിൽ ബിജെപി എംപിക്കെതിരെ കേസെടുത്ത് അന്വേഷണം നടത്തണമെന്ന് ഡൽഹി കോടതി; ഗുജറാത്ത് വൽസാദ് മണ്ഡലത്തിൽനിന്നുള്ള ലോക്സഭാ എംപി കെ.സി പട്ടേലിനെതിരെയാണ് കേസെടുക്കാൻ കോടതി ആവശ്യപ്പെട്ടത്
ന്യൂഡൽഹി: യുവതിയെ പീഡിപ്പിച്ചെന്ന പരാതിയിൽ ബിജെപി എംപിക്കെതിരെ കേസെടുത്ത് അന്വേഷണം നടത്തണമെന്ന് ഡൽഹി കോടതി. ഗുജറാത്ത് വൽസാദ് മണ്ഡലത്തിൽനിന്നുള്ള ലോക്സഭാ എംപി കെ.സി പട്ടേലിനെതിരെ കേസെടുക്കണമെന്നാണ് കോടതി ആവശ്യപ്പെട്ടത്. ഔദ്യോഗിക വസതിയിലുൾപ്പെടെ നിരവധി സ്ഥലങ്ങളിൽവച്ച് എംപി പീഡിപ്പിച്ചതായി യുവതി പരാതിയിൽ പറയുന്നു.
കഴിഞ്ഞ മാർച്ച് മൂന്നിന് എംപിയുടെ ഔദ്യോഗിക വസതിയിൽ ഉച്ചഭക്ഷണത്തിനായി വിളിച്ചുവരുത്തിയ യുവതിയെ എംപി പീഡിപ്പിച്ചു. പിന്നീട് വിവിധ ഇടങ്ങളിൽവച്ച് യുവതിയെ ഇയാൾ പീഡനത്തിനിരയാക്കി. സംഭവം പുറത്തുപറഞ്ഞാൻ കൊന്നുകളയുമെന്ന് എംപി ഭീഷണിപ്പെടുത്തി.
ഭീഷണിക്കുവഴങ്ങാതെ പീഡനം സംബന്ധിച്ച് പരാതിപ്പെട്ടെങ്കിലും കേസെടുക്കാൻ ഡൽഹി പോലീസ് തയാറായില്ലെന്നും യുവതി പറയുന്നു. എന്നാൽ സംഭവം തേൻകെണിയാണെന്നാണ് എംപിയുടെ വാദം. തന്റെ നഗ്ന ചിത്രങ്ങൾ പകർത്തിയ ശേഷം ഒരു സംഘം ആളുകൾ പണം ആവശ്യപ്പെട്ടെങ്കിലും നൽകാത്തതിനെ തുടർന്ന് വ്യാജപരാതിയുമായി രംഗത്ത് വരികയായിരുന്നെന്ന് കെ.സി പട്ടേൽ പറഞ്ഞു.