മൂന്നാം ക്ലാസ് വിദ്യാർഥിനിയെ പീഡിപ്പിച്ച സംഭവം: സിപിഎം പ്രാദേശിക നേതാവ് കീഴടങ്ങി
കൊച്ചി: മൂന്നാം ക്ലാസ് വിദ്യാർഥിനിയെ പീഡിപ്പിച്ച സംഭവത്തിൽ പ്രതിയായ സിപിഎം മുൻബ്രാഞ്ച് സെക്രട്ടറി കീഴടങ്ങി. വല്ലാർപാടം പനന്പുകാട് പുന്നക്കാട്ടിൽ ഷഗി (43)യാണ് തിങ്കളാഴ്ച രാത്രി 11 ഓടെ സെൻട്രൽ സിഐ അനന്തലാലിനു മുന്പിൽ കീഴടങ്ങിയത്.
കഴിഞ്ഞ രണ്ടാം തീയതിയാണ് വല്ലാർപാടത്തെ എൽപി സ്കൂളിലെ മൂന്നാം ക്ലാസ് വിദ്യാർഥിനിയായ എട്ടു വയസുകാരി പീഡനത്തിനിരയായത്. ഇതേ സ്കൂളിൽ പഠിക്കുന്ന മകനെ കൊണ്ടുവിടാൻ സ്കൂളിലേക്ക് നേരത്തെയെത്താറുള്ള ഷഗി മകന് ഗെയിം കളിക്കാൻ മൊബൈൽ നൽകിയ ശേഷം മറ്റു കുട്ടികളൊന്നും ഇല്ലാത്ത സമയത്ത് പെണ്കുട്ടിയെ പീഡിപ്പിക്കുകയായിരുന്നു പതിവ്.
കീഴടങ്ങിയ പ്രതിയെ രാത്രി തന്നെ ജനറൽ ആശുപത്രിയിൽ എത്തിച്ച് വൈദ്യപരിശോധന നടത്തി. പ്രതിയെ ഇന്ന് കോടതിയിൽ ഹാജരാക്കുമെന്നും കസ്റ്റഡിയിൽ വാങ്ങാൻ അപേക്ഷ സമർപ്പിക്കുമെന്നും സെൻട്രൽ സിഐ അറിയിച്ചു. അറസ്റ്റ് ഒഴിവാക്കാൻ ഷഗി നേരത്തെ ഹൈക്കോടതിയിൽ സമർപ്പിച്ച മുൻകൂർ ജാമ്യാപേക്ഷ തള്ളിയിരുന്നു. ഇതിനു പിന്നാലൊയണ് കീഴടങ്ങിയത്.
പ്രതിയായ സിപിഎം പ്രാദേശിക നേതാവിനെ പിടികൂടുന്നത് വൈകുന്നതിൽ പ്രതിഷേധിച്ച് ജനകീയ സമരസമിതിയുടെ നേതൃത്വത്തിൽ നാട്ടുകാർ വല്ലാർപാടത്ത് റോഡ് ഉപരോധിച്ചിരുന്നു.ഉപരോധക്കാരെ നീക്കാൻ പോലീസ് നടത്തിയ ലാത്തിച്ചാർജിൽ ആറോളം പേർക്ക് പരിക്കേറ്റിരുന്നു