തിയറ്ററുകള്‍ പൂരപ്പറമ്പാക്കാന്‍ താരരാജാക്കന്‍മാര്‍ വീണ്ടുമെത്തുന്നു
പുലിമുരുകനും തോപ്പില്‍ ജോപ്പനും ഒന്നിച്ചിറങ്ങിയതിന്റെ ആഘോഷം മാറിയില്ല. അപ്പോഴതാ മമ്മൂക്കയും ലാലേട്ടനും വീണ്ടും തിയറ്ററുകളിലേക്ക് ഒരുമിച്ചെത്തുന്നു.
സംവിധായകന്‍ ജിബു ജേക്കബിന്റെ മുന്തിരിവള്ളികള്‍ തളിര്‍ക്കുമ്പോളാണ് മോഹന്‍ ലാലിന്റെ അടുത്ത ചിത്രം. ക്രിസ്മസ് റിലീസായിരിക്കും ചിത്രം. ഡിസംബര്‍ 22 മുന്തിരിവള്ളികള്‍ തളിര്‍ക്കുമ്പോള്‍ തിയറ്ററിലെത്തുമെന്ന് നിര്‍മ്മാതാക്കള്‍ അറിയിച്ചു. നവംബര്‍ നാലിന് ചിത്രം തിയറ്ററുകളിലെത്തിക്കാനായിരുന്നു ആദ്യം തീരുമാനിച്ചിരുന്നത്. എന്നാല്‍ വൈശാഖ് സംവിധാനം ചെയ്ത ബ്രഹ്മാണ്ഡ ചിത്രം പുലിമുരുകന്റെ തിരക്കുകള്‍ ഒഴിയാത്തതിനാല്‍ റിലീസ് നീട്ടി വെക്കുകയായിരുന്നു. പുലിമുരുകന്‍ അന്യഭാഷകള്‍ സംസാരിക്കാന്‍ തയ്യാറെടുക്കുകയാണ്. നിര്‍മ്മാതാക്കളായ വീക്കെന്‍ഡ് ബ്ലോക്ക് ബസ്റ്റേഴ്‌സാണ് മോഹന്‍ലാല്‍ പഞ്ചായത്ത് സെക്രട്ടറിയായ ഉലഹന്നാനായി എത്തുന്ന മുന്തിരിവള്ളികള്‍ തളിര്‍ക്കുമ്പോളിന്റെ റിലീസ് വാര്‍ത്ത പുറത്ത് വിട്ടത്.
മമ്മൂട്ടിയെ നായകനാക്കി പുതുമുഖം ഹനീഫ് അദേനി സംവിധാനം ചെയ്യുന്ന ദ ഗ്രേറ്റ് ഫാദര്‍ ക്രിസ്മസ് റിലീസായിരിക്കുമെന്ന് നേരത്തെ തന്നെ അറിയിച്ചിരുന്നു. പൃഥ്വിരാജ് നിര്‍മ്മാണം നിര്‍വ്വഹിക്കുന്ന ചിത്രം ഒരു ഫാമിലി ത്രില്ലറായിരിക്കുമെന്നാണ് അറിയാന്‍ കഴിയുന്നത്. ജിക്കു ജേക്കബ്-മോഹന്‍ലാല്‍ ചിത്രവും കുടുംബ ചിത്രമാണ്. ഇതോടെ സൂപ്പര്‍ താരങ്ങള്‍ രണ്ടുപേരും കുടുംബ ചിത്രങ്ങളുമായി ഒരുമിച്ച് തിയറ്ററിലെത്തുന്നു എന്ന പ്രത്യേകതയുമുണ്ട്. വിജെ ജെയിംസിന്റെ പ്രണയോപനിഷത്ത് എന്ന ചെറുകഥയെ ആസ്പദമാക്കിയാണ് മുന്തിരിവള്ളികള്‍ തളിര്‍ക്കുമ്പോള്‍ ഒരുക്കുന്നത്. എം സിന്ധുരാജിന്റെയാണ് തിരക്കഥ.
ദൃശ്യത്തിന് ശേഷം മോഹന്‍ലാലും മീനയും ഒന്നിച്ചെത്തുന്ന ചിത്രം കൂടിയാണ് മുന്തിരിവള്ളികള്‍ തളിര്‍ക്കുന്നു. തോപ്പില്‍ ജോപ്പനും പുലിമുരുകനും ഒരേ ദിവസം റിലീസ് ചെയ്തതോടെ തിയറ്ററുകളില്‍ ഉത്സവ പ്രതീതിയായിരുന്നു. കളക്ഷന്‍ റെക്കോര്‍ഡുകള്‍ തകര്‍ത്ത പുലിമുരുകന്റെ ജൈത്രയാത്ര ഇപ്പോഴും തുടരുകയാണ്.
