കലാഭവന്‍ മണിയുടെ ഔട്ട്ഹൗസായ പാഡിയില്‍ മദ്യസല്‍ക്കാരത്തിനു ചാരായം എത്തിച്ചത് മണിയുടെ സുഹൃത്തായ ചാലക്കുടി സ്വദേശിയായ ജോമോന്‍
കലാഭവന്‍ മണിയുടെ ഔട്ട്ഹൗസായ പാഡിയില്‍ മദ്യസല്‍ക്കാരത്തിനു ചാരായം എത്തിച്ചത് മണിയുടെ സുഹൃത്തായ ചാലക്കുടി സ്വദേശിയായ ജോമോനാണെന്ന് അന്വേഷണ സംഘം. ഫെബ്രുവരി പകുതിയോടെയാണ് പാഡിയില്‍ ഇയാള്‍ വാറ്റുചാരായം എത്തിച്ചത്. സംഭവശേഷം ഇയാള്‍ വിദേശത്തേക്കു പോകുകയും ചെയ്തു.
ജോമോനെ തിരികെ എത്തിക്കാനുള്ള ശ്രമം തുടങ്ങിയതായും പോലീസ് പറഞ്ഞു. തൃശൂര്‍ വരന്തരപ്പള്ളിയില്‍ സ്വദേശി ജോയ് ക്കെതിരെ ചാരായം ഉണ്ടാക്കിയതിനും പോലീസ് കേസെടുത്തിട്ടുണ്ട്. ഇയാളെ പോലീസ് കസ്റ്റഡിയിലെടുത്തു.
സംഭവത്തോടനുബന്ധിച്ച് പത്തുപേരെ അന്വേഷണ സംഘം കസ്റ്റഡിയിലെടുത്തിരുന്നു. ഇവര്‍ക്കെതിരെ അബ്കാരി നിയമപ്രകാരം കേസെടുത്തേക്കുമെന്നാണു സൂചന. ഇതുവരെ ചോദ്യംചെയ്തവരെ വീണ്ടും ചോദ്യംചെയ്യും.
മണിയുടെ ശരീരത്തില്‍ കാര്‍ഷികാവശ്യങ്ങള്‍ക്കുപയോഗിക്കുന്ന കീടനാശിനിയുടെ സാന്നിധ്യം വെള്ളിയാഴ്ച സ്ഥിരീകരിച്ചതോടെ കാരണം തേടിയുള്ള അന്വേഷണം പോലീസ് ഊര്‍ജിതമാക്കിയിരുന്നു.
