ബി.ജെ.പി ദേശീയ അധ്യക്ഷനായി അമിത് ഷാ എതിരില്ലാതെ തെരഞ്ഞെടുക്കപ്പെട്ടു; അദ്വാനിയും ജോഷിയും യോഗത്തില് പങ്കെടുത്തില്ല
ന്യൂഡല്ഹി: അമിത് ഷായെ വീണ്ടും ബി.ജെ.പി ദേശീയ അധ്യക്ഷനായി എതിരാളികളില്ലാതെ തെരഞ്ഞെടുത്തു. മുതിര്ന്ന നേതാക്കളായ എല്.കെ അദ്വാനിയും മുരളി മനോഹര് ജോഷിയും തെരഞ്ഞെടുപ്പ് യോഗത്തില് പങ്കെടുത്തില്ല. ഇന്നു രാവിലെയാണ് ഷാ നാമനിര്ദേശ പത്രിക സമര്പ്പിച്ചത്. കേന്ദ്രമന്ത്രിസഭയിലെ ബി.ജെ.പി അംഗങ്ങളും പാര്ട്ടി ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാരും പാര്ട്ടി വൈസ് പ്രസിഡന്റുമാര്, ജനറല് സെക്രട്ടറിമാര് അടക്കമുള്ള നേതാക്കളും ഷായ്ക്ക് പിന്തുണയുമായി എത്തിയിരുന്നു.
അമിത് ഷായുടെ നേതൃത്വത്തില് പാര്ട്ടിക്ക് മഹാരാഷ്ട്ര, ഹരിയാന, ഝാര്ഖണ്ഡ്, ജമ്മു കശ്മീര് എന്നിവിടങ്ങളില് അധികാരത്തിലെത്താന് കഴിഞ്ഞത് അധ്യക്ഷ പദവിയിലേക്ക് വീണ്ടും എത്തുന്നതിനു വഴി തുറന്നു. എന്നാല് ഡല്ഹി, ബിഹാര് തെരഞ്ഞെടുപ്പുകളില് പാര്ട്ടിക്കേറ്റ തിരിച്ചടി ചെറുതായിരുന്നില്ല. ഈ വര്ഷം കേരളം, അസ്സം ബംഗാള് എന്നീ സംസ്ഥാനങ്ങളില് നടക്കുന്ന തെരഞ്ഞെടുപ്പിലും പാര്ട്ടിയുടെ പ്രതീക്ഷ അമിത് ഷായിലാണ്.
പ്രസിഡന്റ് പദവിയില് അമിത് ഷായുടെ നിലവിലെ കാലാവധി ശനിയാഴ്ച അവസാനിച്ചിരുന്നു. ഇന്നു മുതല് മൂന്നു വര്ഷമാണ് പുതിയ കാലാവധി.