കരിമ്പനകളുടെ നാട്ടിലേക്ക് ഒരു യാത്ര പോയാലോ???
കേരളത്തിന്റെ നെല്ലറ, കരിമ്പനകളുടെ നാട് എന്നിങ്ങനെ വിവിധ പേരുകളിൽ അറിയപ്പെടുന്ന പശ്ചിമഘട്ടത്തിന്റെ ഭാഗമായ ജില്ലയാണ് പാലക്കാട്. പൊന്നണിഞ്ഞ വയലുകൾ, ഗാഭീര്യത്തോടെ ഒഴുകുന്ന നിള, തലയെടുപ്പോടെ നിൽക്കുന്ന മലനിരകൾ തുടങ്ങിയവ ഇവിടം മാറ്റുകൂട്ടുന്നു. സാംസ്കാരികവും ചരിത്രപരമായ ഒട്ടനവധി പ്രത്യേകതകൾ കൂടി കേരളത്തിന്റെ പ്രവേശന കവാടമായ പാലക്കാടിനുണ്ട്.
ടൂറിസത്തിന്റെ കാര്യത്തിലും ഒട്ടും പിറകിലല്ല. പാലക്കാടിന്റെ സൗന്ദര്യം വിനോദസഞ്ചാരികളോട് പങ്കുവയ്ക്കുന്നതിനായി നിരവധി വിനോദകേന്ദ്രങ്ങൾ ഇവിടെ പ്രവർത്തിക്കുന്നു. പാലക്കാട്ടേക്ക് യാത്ര തിരിക്കുന്നവർ കണ്ടിരിക്കേണ്ട പ്രധാന സ്ഥലങ്ങൾ പരിചയപ്പെടാം.
നെല്ലിയാമ്പതി
‘പാവങ്ങളുടെ ഊട്ടി’ എന്നു വിളിക്കുന്ന മഞ്ഞുമലകളാൽ ചുറ്റപ്പെട്ട മലമ്പ്രദേശമാണ് നെല്ലിയാമ്പതി. പാലക്കാട് ടൗണിൽ നിന്നും ഏകദേശം 60 കി.മീ അകലെയായി സ്ഥിതിചെയ്യുന്നു. 467 മീറ്റർ മുതൽ 1572 മീറ്റർ വരെയുള്ള മലനിരകൾ ഇവിടെ കാണാവുന്നതാണ്. നെല്ലിയാമ്പതിയിലെ തേയില, കാപ്പി, ഓറഞ്ച് തോട്ടങ്ങളും വിനോദസഞ്ചാരികളുടെ കണ്ണിനു കുളിർമ നൽകുന്നു.
മനോഹരമായ പുൽമേടുകളും ആകാശത്തിന് കടപിടിക്കുന്ന വൻ വൃക്ഷങ്ങളും നിറഞ്ഞ മാട്ടുമല നെല്ലിയാമ്പതിക്കടുത്താണ്. നെല്ലിയാമ്പതിയിലെ പാടഗിരിയിൽ നിന്നും കുത്തനെയുള്ള കയറ്റം കയറി ഒമ്പത് കിലോമീറ്ററോളം യാത്ര ചെയ്താൽ മാട്ടുമലയിൽ എത്താം. ജീപ്പാണ് പ്രധാന യാത്രാമാർഗം. സാഹസിക യാത്രകൾ ഇഷ്ട്പ്പെടുന്നവർക്ക് അനുയോജ്യമായ സ്ഥലമാണ്. ബ്രിട്ടീഷുകാരുടെ കാലത്ത് നിർമ്മിച്ച പലകപ്പാണ്ടി ബംഗ്ലാവ്, കൈകാട്ടി കമ്യൂണിറ്റി ഹാളും നെല്ലിയാമ്പതിയിലെ പ്രധാന റിസോർട്ടുകളാണ്. പലകപ്പാണ്ടിക്കടുത്തുള്ള സീതാർക്കുണ്ട് അതിമനോഹരമായ താഴ്വരയാണ്. ഇവിടെ നിന്നും ഹരിത വർണാഭമായ കാഴ്ച്ചകൾ കാണാൻ കഴിയും. വഴിയോരങ്ങളിലെ വെള്ളച്ചാട്ടങ്ങളും ഇവിടം മാറ്റുകൂട്ടുന്നു. കാട്ടുപോത്ത്, മലയണ്ണാൻ, ആന, വരയാട്, പുള്ളിപ്പുലി എന്നിവയുടെ സാങ്കേതിക കേന്ദ്രം കൂടിയാണ് നെല്ലിയാമ്പതി.
മലമ്പുഴ
പശ്ചിമഘട്ടത്തിന്റെ താഴ്വരയിൽ സ്ഥിതി ചെയ്യുന്ന,കേരളത്തിലെ ഏറ്റവും വലിയ ജലസേചന മേഖലയാണ് മലമ്പുഴ. ഭാരതപ്പുഴയ്ക്ക് സമർപ്പണമായാണ് ‘മലമ്പുഴ’ എന്ന പേര് നൽകിയത്. പാലക്കാട് ജംങ്ഷനിൽ നിന്നും 5 കി.മീ അകലെ സ്ഥിതി ചെയ്യുന്നു. 1955-ൽ നിർമ്മിച്ച മലമ്പുഴ ഡാം ടൂറിസം വകുപ്പിന്റെ കീഴിലാണ്. കാനായി കുഞ്ഞിരാമൻ സിമന്റിൽ തീർത്ത യക്ഷിയുടെ ശില്പം, പത്മ ശ്രീ നെക്ക് ചന്ദ് സൈനിയുടെ നേതൃത്വത്തിൽ പാഴ്വസ്തുക്കളാൽ നിർമിക്കപ്പെട്ട ശിപങ്ങൾ (റോക്ക് ഗാർഡൻ), മലമ്പുഴ ഉദ്യാനം, റോപ് വേ, സ്നേക്ക് പാർക്ക്, അക്വാറിയം തുടങ്ങിയവയാണ് ഇവിടത്തെ പ്രധാന ആകർഷണം.
പോത്തുണ്ടി
നെല്ലിയാമ്പതിക്കടുത്തായി സ്ഥിതിചെയ്യുന്ന പോത്തുണ്ടി ഡാം പാലക്കാട് നിന്നും 42 കി.മീ അകലെയാണ്. തേക്കുമരങ്ങൾക്കിടയിൽ ധാരാളം ഹെയർപിന്നുകളടങ്ങിയ വഴിയിലൂടെയാണ് യാത്ര ചെയ്യേണ്ടത്. പാലക്കാട് ചുരത്തിന്റെ യഥാർത്ഥ ചിത്രം ഈ മലമ്പ്രദേശത്ത് നിന്നും വ്യക്തമായി കാണാൻ കഴിയും. പോത്തുണ്ടി ഡാമിനോട് ചേർന്നുള്ള മനോഹരമായ പൂന്തോട്ടം, ബോട്ടിങ് അതിഥികൾക്കായി ഒരുക്കിയിട്ടുണ്ട്.
പാലക്കാട് കോട്ട
പാലക്കാടിന്റെ ഹൃദയഭാഗത്തായി സ്ഥിതിചെയ്യുന്നു. ടിപ്പുസുൽത്താന്റെ കോട്ട എന്നും വിളിക്കാറുണ്ട്. 1766-ൽ പണികഴിപ്പിച്ച ഈ കോട്ട പിന്നീട് പിടിച്ചടക്കിയ ബ്രിട്ടീഷുകാർ കോട്ട പുനരുദ്ധീകരിച്ചു. പല വീരകഥകളും ഉറങ്ങുന്ന ഈ കോട്ട ഇന്ന് ആർക്കിയോളജിക്കൽ സർവേ ഓഫ് ഇന്ത്യ യുടെ കീഴിലാണ്.
സൈലന്റ് വാലി
വടക്ക്- കിഴക്ക് കോണിലായി വിസ്തൃതിയിൽ സൈലന്റ് വാലി സ്ഥിതി ചെയ്യുന്നു. പാലക്കാട് ടൗണിൽ നിന്നും 76 കി.മീ ദൂരെ അട്ടപ്പാടിയിലാണ് ഈ നാഷണൽ പാർക്ക്. ചീവീടുകളെ നിശബ്ദരായി കാണപ്പെടുന്ന നാഷണൽ പാർക്ക് എന്ന പ്രത്യേകതയാണ് നിശബ്ദതാഴ്വരയുടേത്. സൈലന്റ് വാലി എന്ന പേരിനു പിന്നിലും ഇതു തന്നെയാണ് കാരണം. ഏറ്റവും കൂടുതൽ സിംഹവാലൻ കുരങ്ങുകളെ കാണപ്പെടുന്നത് സൈലന്റ് വാലിയിലാണ്. വേഴമ്പൽ, നീലഗിരിയിൽ കാണപ്പെടുന്ന പ്രത്യേകയിനം പക്ഷികൾ, ഉപദ്വീപുകളിൽ മാത്രം കണ്ടുവരുന്ന സസ്തനികൾ, 100-ൽ കൂടുതൽ വ്യത്യസ്ഥമാർന്ന ചിത്രശലഭങ്ങൾ, 400-ൽ പരം നിശാശലഭങ്ങൾ എന്നിവയും ഇവിടെ കാണാം. മുൻകൂർ അനുമതിയോടുകൂടി മാത്രമേ വിനോദസഞ്ചാരികളെ പ്രവേശിക്കുകയുള്ളൂ.
പറമ്പിക്കുളം
പാലക്കാട് ടൗണിൽ നിന്നും 110 കി.മീ അകലെയായി തമിഴ്നാടിനോടടുത്ത് കിടക്കുന്ന പശ്ചിമഘട്ട പ്രദേശമാണ് പറമ്പിക്കുളം. കേരളത്തിലെ പ്രധാന കടുവ സംരക്ഷണ കേന്ദ്രങ്ങളിലൊന്നായും പറമ്പിക്കുളം അറിയപ്പെടുന്നു. കടുവ, വെള്ളിക്കെട്ടൻ, കറുത്ത പരുന്ത്, കടൽകാക്ക, സിംഹവാലൻ കുരങ്ങ്, അണലി, വരയാട്, പുള്ളിമാൻ, വിവിധയിനം ചിലന്തികൾ തുടങ്ങിയവയും ഈട്ടി, ചന്ദനം എന്നിങ്ങനെ അനേകം വൃക്ഷങ്ങളും ഔഷധ സസ്യങ്ങളും ഇവിടെ കാണാം. ലോകത്തിലെ ഏറ്റവും പഴക്കമേറിയ പറമ്പിക്കുളത്തെ ‘കന്നിമാരി’ എന്ന മുത്തശ്ശി തേക്കുമരം വിനോദസഞ്ചാരികളിൽ കൗതുകമുണർത്തുന്നു. ഏകദേശം അഞ്ഞൂറിൽ കൂടുതൽ വർഷം പഴക്കമുണ്ടെന്നാണ് പറയപ്പെടുന്നത്.
കിള്ളിക്കുറിശ്ശിമംഗലത്തെ കുഞ്ചൻ സ്മാരകം, ഖസാഖിന്റെ ഇതിഹാസത്തിലെ തസ്രാക്ക്, അർദ്ധ കാശി എന്നറിയപ്പെടുന്ന കൽപാത്തി, ധോണിയിലെ വെള്ളച്ചാട്ടം, മംഗലം ഡാം, മഴമേഘങ്ങളുടെ ഉത്ഭവസ്ഥാനമെന്ന് വിശേഷിപ്പിക്കുന്ന കവ, കൃഷിയെ സ്നേഹിച്ച്, പ്രകൃതിയോടിണങ്ങി ജീവിക്കുന്ന ഗ്രാമീണർ, അവരുടെ ഭാഷാശൈലി…. ഇവയെല്ലാം പാലക്കാടിന് മാറ്റുകൂട്ടുന്നവയാണ്. സെപ്തംബർ-മെയ് മാസങ്ങളാണ് യാത്രയ്ക്ക് ഏറ്റവും അനുയോജ്യം.