നിയമന തട്ടിപ്പ്:മധ്യപ്രദേശ് ഗവര്‍ണര്‍ റാം നരേഷ് യാദവിനെതിരെ രജിസ്റ്റർ ചെയ്ത എഫ്.ഐ.ആർ ഹൈക്കോടതി റദ്ദാക്കി
6 May 2015
നിയമന തട്ടിപ്പുമായി ബന്ധപ്പെട്ട് മധ്യപ്രദേശ് ഗവര്‍ണര്‍ റാം നരേഷ് യാദവിനെതിരെ സ്പെഷ്യൽ ടാസ്ക് ഫോഴ്സ് രജിസ്റ്റർ ചെയ്ത എഫ്.ഐ.ആർ ഹൈക്കോടതി റദ്ദാക്കി. പ്രമുഖ അഭിഭാഷകരായ രാംജഠ്മലാനി, ത്രിവേദി, പതേരിയ എന്നിവരാണ് നരേഷ് യാദവിന് വേണ്ടി ഹൈക്കോടതിയിൽ ഹാജരായത്.
വനംവകുപ്പ് ഗാര്‍ഡുമാരുടെ നിയമനത്തിനായി എം.പി.പി.ഇ.ബി നടത്തിയ എഴുത്ത് പരീക്ഷയില്‍ ഇടപെട്ടുവെന്നാണ് റാം നരേഷ് യാദവിനെതിരായ ആരോപണം. ഈ വർഷം ഫെബ്രുവരിയിലാണ് അദ്ദേഹത്തിനെതിരെ പ്രത്യേക അന്വേഷണ സംഘം എഫ്.ഐ.ആർ രജിസ്റ്റർ ചെയ്തത്. തുടർന്ന്, എഫ്.ഐ.ആർ റദ്ദാക്കണമെന്ന് ആവശ്യപ്പെട്ട് ഗവർണർ ഹൈക്കോടതിയെ സമീപിക്കുകയായിരുന്നു.
