തന്റേതെന്ന് പറഞ്ഞ്‌വാട്‌സ്ആപ്പില്‍ പ്രചരിക്കുന്ന അശ്ലീല ചിത്രത്തിന്റെ സൃഷ്ടാവിന് രചനയുടെ മറുപടി

single-img
26 February 2015

Rachana

വാട്‌സ്ആപ്പില്‍ തന്റേതെന്ന രീതിയില്‍ പ്രചരിക്കുന്ന ീഅശ്ലീല ചിത്രത്തിന്റെ സൃഷ്ടാവിന് രചന നാരായണന്‍കുട്ടിയുടെ മറുപടി. തന്റെ ഔദ്യോഗിക ഫേസ്ബുക്ക് പേജിലൂടെയാണ് രചന പ്രതികരിച്ചത്.

ആടിനെ പട്ടി ആക്കുന്ന നയം എന്ന് ഞാന്‍ കേട്ടിട്ടേ ഉണ്ടായിരുന്നുള്ളൂവെന്നും എന്നാല്‍ ഈ കഴിഞ്ഞ ദിവസങ്ങളില്‍ ആ അനുഭവം തനിക്കുണ്ടായി എന്നും രചന പറയുന്നു. ചില സുഹൃത്തുക്കള്‍ വാട്‌സപ്പ് വഴി അയച്ചു തന്ന നഗ്‌നചിത്രമാണ് തന്റെ പോസ്റ്റിന് ആധാരമെന്നും രചന പറുന്നു.

കടുത്ത ഭാഷയിലാണ് ഇത്തരം ചിത്രങ്ങള്‍ സൃഷ്ടിച്ചുവിടുന്നവരെ രചന വിമര്‍ശിച്ചിരിക്കുന്നത്. ഞാനെന്ന ഒരു പെണ്‍കുട്ടിയുടെ മാത്രം പ്രശ്‌നമായി ഇതു കാണാന്‍ കഴിയുന്നില്ലെന്നും ഇത്തരം പ്രശ്‌നങ്ങള്‍ നേരിടുന്ന സ്ത്രീ സമൂഹത്തിനു വേണ്ടി പ്രതികരിച്ചു പോകുന്നുവെന്നും രചന സൂചിപ്പിക്കുന്നു. വീട്ടില്‍ ഉള്ള സ്ത്രീകളെ ബഹുമാനിക്കാത്തവര്‍ നാട്ടില്‍ ഉള്ളവരെ എങ്ങനെ ബഹുമാനിക്കുമെന്നും രചന ചോദിക്കുന്നുണ്ട്.

പോസ്റ്റിന്റെ പൂര്‍ണ്ണരൂപം

ആടിനെ പട്ടി ആക്കിയ കഥ!!!

ആടിനെ പട്ടി ആക്കുന്ന നയം എന്ന് ഞാൻ കേട്ടിട്ടേ ഉണ്ടായിരുന്നുള്ളൂ:എന്നാൽ ഈ കഴിഞ്ഞ ദിവസങ്ങളിൽ ആ അനുഭവം നേരിട്ടുണ്ടായി.
ചില സുഹൃത്തുക്കൾ വാട്സപ്പ് വഴി അയച്ചു തന്ന ഒരു ചിത്രമാണ് ഈ പോസ്റ്റിന് ആധാരം.
വെറുമൊരു ചിത്രമല്ല അത്‐ മറിച്ച് ഒരു അശ്ലീല ചിത്രം!
ചിത്രത്തിന്റെ ഒരു പകുതിയിൽ എന്റേതും മറു പകുതിയിൽ ഞാൻ എന്നു തോന്നിക്കുന്ന(ഒരു പ്രത്യേക ആംഗിളിൽ മാത്രം) മറ്റൊരു പെൺകുട്ടിയുടേതുമായ അശ്ലീല ചിത്രവും.
സത്യം പറഞ്ഞാൽ ആ ചിത്രം കണ്ടിട്ട് എനിക്ക് *അയ്യോ* എന്ന് നിലവിളിക്കാനൊന്നും തോന്നിയില്ല!
പിന്നീട്, *ധൈര്യമായിരിക്കൂ,സാരമില്ല,സൂക്ഷിക്കണം* എന്നൊക്കെ പറഞ്ഞ് എനിക്ക് വന്ന സന്ദേശങ്ങൾ ആണ് ഞാൻ കണ്ടത്. ആ സ്നേഹത്തിന് ഒരുപാടു നന്ദി.
പക്ഷെ…ഈ സമൂഹത്തിനോടൊരു ചോദ്യം ‐ എന്താണ് ഞാൻ സൂക്ഷിക്കേണ്ടത്?? എന്തിനെ ആണ് ഞാൻ സാരമില്ല എന്നു കരുതേണ്ടത്???
ഒരുപാട് അശ്ലീല ചിത്രങ്ങളുടേയും വിഡിയോകളുടേയും ഭാരത്താൽ മുങ്ങി കിടക്കുന്ന ഇന്റർനെറ്റ് എന്ന വലയിൽ നിന്നും എന്നെ പോലെ തോന്നിക്കുന്ന ഒരു പെൺകുട്ടിയെ കണ്ടുപിടിച്ച് അത് ഞാനാണെന്ന് വരുത്തി തീർക്കാൻ ശ്രമിച്ച ആ ………………….ന്റെ (നിങ്ങൾക്കു പൂരിപ്പിക്കാം) കാഞ്ഞ ബുദ്ധിയെ ആണോ ഞാൻ സൂക്ഷിക്കേണ്ടത്? അതോ, *എന്തിനിത് ചെയ്തു* എന്ന ചോദ്യത്തിന് *വെറുതെ ഒരു തമാശക്ക്* എന്ന് ഉത്തരം തന്നേക്കാവുന്ന ആ *മഹാനുഭാവന്റെ* കാമോത്സാഹത്തെയാണോ ഞാൻ സാരമില്ല എന്നു കരുതേണ്ടത്???
ഒപ്പം ഒരു ചോദ്യം കൂടി ‐ അല്ലയോ *മഹാമനസ്ക്കാ* അങ്ങയോടും അങ്ങയുടെ വീട്ടിൽ ഉള്ളവരോടും ഞാൻ ചെയ്ത അപരാതം എന്താണ്!!!?
ലജ്ജ തോന്നുന്നു എനിക്ക് നിങ്ങളുടെ ഈ അധഃപതിച്ച സംസ്ക്കാരത്തോട്!
അതിശയമില്ല….!കാരണം..വീട്ടിൽ ഉള്ള സ്ത്രീകളെ ബഹുമാനിക്കാത്തവർ നാട്ടിൽ ഉള്ളവരെ എങ്ങനെ ബഹുമാനിക്കും!
ഞാനെന്ന ഒരു പെൺകുട്ടിയുടെ മാത്രം പ്രശ്നമായി ഇതു കാണാൻ കഴിയുന്നില്ല. ഇത്തരം പ്രശ്നങ്ങൾ നേരിടുന്ന സ്ത്രീ സമൂഹത്തിനു വേണ്ടി പ്രതികരിച്ചു പോകുന്നു;ചോദിച്ചു പോകുന്നു : *ഇനിയെങ്കിലും നന്നായിക്കൂടെ!!!*
അമ്മയെ തല്ലിയാലും രണ്ടുണ്ട് പക്ഷം (അത് കിട്ടേണ്ടതാണെന്നും,അയ്യോ കഷ്ടം എന്നും പറയുന്നവർ ഉണ്ടാകുമല്ലോ) എന്ന വ്യക്തമായ ധാരണയോടെ തന്നെ ആണ് ഇതിവിടെ അവതരിപ്പിച്ചത്.
അതുകൊണ്ട് തന്നെ, ഈ ആടിനെ പട്ടിയാക്കി മാറ്റിയ കളി കണ്ടവരോടും, കേട്ടവരോടും,പറഞ്ഞു പരത്തി പ്രാത്സാഹിപ്പിച്ചവരോടും കൂടി ഒന്നേ പറയാനുള്ളൂ ‐ *എന്നെ,അറിയുന്നവർക്കു അറിയാം… അല്ലാത്തവർക്കു ചൊറിയാം(ഇതുപോലെ)!*
സ്നേഹത്തോടെ
രചന