ഗുജറാത്തിലെ വഡോദരയിൽ ഇന്റർനെറ്റും എസ്എംഎസും നിരോധിച്ചു
28 September 2014
ഇരുവിഭാഗങ്ങൾ തമ്മിൽ സംഘർഷമുണ്ടായ ഗുജറാത്തിലെ വഡോദരയിൽ മൊബൈൽ ഡാറ്റാ, എസ്എംഎസ് സേവനങ്ങൾ നിരോധിച്ചു. വർഗീയ സംഘർഷം തുടരുന്ന സാഹചര്യത്തിൽ സോഷ്യൽ നെറ്റ്‌വ‌ർക്കുകളിലൂടെയും മെസഞ്ചറുകളിലൂടെയും വർഗീയ ചുവയുള്ള സന്ദേശങ്ങൾ പ്രചരിക്കാൻ തുടങ്ങിയിരുന്നു. ഇതു കണക്കിലെടുത്താണ് സെപ്റ്റംബർ 30 വരെ ഇന്റർനെറ്റും എസ്എംഎസും നിരോധിച്ചിരിക്കുന്നത്. ഫേസ്ബുക്ക് പോസ്റ്റിനെ ചൊല്ലിയാണ് വഡോദരയിൽ ഇരുവിഭാഗങ്ങൾ തമ്മിൽ വ്യാഴാഴ്ച സംഘർഷമുണ്ടായതും. രണ്ടു ദിവസമായി തുടരുന്ന സംഘർഷത്തിൽ നിരവധി വാഹനങ്ങൾ അഗ്നിക്കിരയായിരുന്നു.
