എം.എ.ബേബി എം.എൽ.എ ഹാജർ പുസ്തകത്തിൽ ഒപ്പിടാതിരുന്നത് ചട്ടവിരുദ്ധമാണെന്ന് സ്പീക്കർ
17 June 2014
നിയമസഭാ നടപടികളിൽ പങ്കെടുത്ത സി.പി.എം എം.എൽ.എ എം.എ.ബേബി ഹാജർ പുസ്തകത്തിൽ ഒപ്പിടാതിരുന്നത് ചട്ടവിരുദ്ധമാണെന്ന് സ്പീക്കർ ജി.കാർത്തികേയന്റെ റൂളിംഗ്. ഭരണപക്ഷത്ത് നിന്ന് കെ.എൻ.എ ഖാദർ ക്രമപ്രശ്‌നമായി ഈ വിഷയം ഉന്നയിച്ചപ്പോഴായിരുന്നു സ്പീക്കറുടെ റൂളിംഗ്.
നിയമസഭാ സമ്മേളനം നടക്കുമ്പോൾ മുഖ്യമന്ത്രി, പ്രതിപക്ഷ നേതാവ്, ചീഫ് വിപ്പ്, മന്ത്രിമാർ, സ്പീക്കർ എന്നിവരൊഴികെയുള്ള അംഗങ്ങൾ ഹാജർ ബുക്കിൽ ഒപ്പിടണമെന്നാണ് നിയമസഭാ ചട്ടം 172ൽ പറയുന്നത്. ഇത് ബേബി ലംഘിച്ചു. അതേസമയം ധനാഭ്യർത്ഥന ചർച്ചയുടെ വോട്ടെടുപ്പിൽ അദ്ദേഹം പങ്കെടുക്കുകയും ചെയ്തു. എന്നാൽ ഹാജർ പുസ്തകത്തിൽ ഒപ്പിട്ടില്ലെങ്കിലും വോട്ട് ചെയ്യാമെന്നും സ്പീക്കർ വ്യക്തമാക്കി.
