Kerala

ഇ. ശ്രീധരന്‍ മെട്രോ റെയിലിന്റെ പ്രവര്‍ത്തനങ്ങള്‍ വിലയിരുത്തി

കൊച്ചി മെട്രോ റെയിലിന്റെ മുന്നൊരുക്ക പ്രവര്‍ത്തനങ്ങള്‍ ഡിഎംആര്‍സി മുഖ്യ ഉപദേഷ്ടാവ് ഇ. ശ്രീധരന്‍ വിലയിരുത്തി. ഇന്നലെ രാവിലെ കൊച്ചിയിലെത്തിയ അദ്ദേഹം എറണാകുളം നോര്‍ത്ത് മേല്‍പ്പാലത്തിന്റെയും കെഎസ്ആര്‍ടിസി ഡിപ്പോയ്ക്കു സമീപം സലിം രാജന്‍ റോഡിലെ മേല്‍പ്പാലത്തിന്റെയും നിര്‍മാണ പുരോഗതി പരിശോധിച്ചു. ഈ മാസം 15-നകം നോര്‍ത്തിലെ രണ്ടു ചെറുപാലങ്ങളും ഗതാഗതത്തിനായി തുറന്നുകൊടുക്കാനാകുമെന്നാണു പ്രതീക്ഷയെന്നും എന്നാല്‍ മുഖ്യമന്ത്രിയുടെ സൗകര്യം അനുസരിച്ചായിരിക്കും തീയതി നിശ്ചയിക്കുകയെന്നും ശ്രീധരന്‍ മാധ്യമപ്രവര്‍ത്തകരോടു പറഞ്ഞു. കൊച്ചി മെട്രോയെ സംബന്ധിച്ച വിവാദ പ്രശ്‌നങ്ങളില്‍ പ്രതികരിക്കാന്‍ അദ്ദേഹം തയാറായില്ല. എന്നാല്‍, പ്രാഥമിക നിര്‍മാണപ്രവര്‍ത്തനങ്ങളുമായി മുന്നോട്ടുപോകുകയാണെന്ന് അദ്ദേഹം വ്യക്തമാക്കി.