കവിയൂര്‍ കേസില്‍ തുടരന്വേഷണം നടത്തണം

single-img
30 March 2012

കവിയൂര്‍ പീഡനക്കേസില്‍ തുടരന്വേഷണം നടത്താന്‍ കോടതി ഉത്തരവിട്ടു. തിരുവനന്തപുരം സിബിഐ കോടതിയുടേതാണ് ഉത്തരവ്. ജീവനൊടുക്കിയ അനഘയുടെ ശരീരത്തില്‍ പുരുഷ ബീജം കണ്‌ടെത്തിയതിനെക്കുറിച്ചും ഇത് എങ്ങനെ വന്നു എന്നതിനെക്കുറിച്ചും വിശദമായി അന്വേഷിക്കണമെന്നാണ് കോടതിയുടെ നിര്‍ദേശം.

രാഷ്ട്രീയഉന്നതര്‍ അടക്കമുള്ളവര്‍ അനഘയെ പീഡിപ്പിച്ചിട്ടുണ്‌ടോയെന്ന് കൂടുതല്‍ അന്വേഷണം നടത്തണമെന്നും കോടതി നിര്‍ദേശിച്ചിട്ടുണ്ട്. ജൂണ്‍ 30 നകം അന്തിമ റിപ്പോര്‍ട്ട് സമര്‍പ്പിക്കണം. സിബിഐ തിരുവനന്തപുരം പ്രത്യേക കോടതി ജഡ്ജി ടി.എസ്.പി മൂസത് ആണ് തുടരന്വേഷണ ഉത്തരവിട്ടത്. അതേസമയം അനഘയെ അച്ഛന്‍ നാരായണന്‍ നമ്പൂതിരിയാണ് പീഡിപ്പിച്ചതെന്ന സിബിഐ റിപ്പോര്‍ട്ടിലെ കണ്‌ടെത്തല്‍ കോടതി തള്ളി. എന്നാല്‍ അനഘയെ മറ്റാരും പീഡിപ്പിച്ചിട്ടില്ലെന്ന കണ്‌ടെത്തല്‍ ശരിവെച്ച കോടതി അന്വേഷണ റിപ്പോര്‍ട്ട് ഭാഗീകമായി അംഗീകരിച്ചു.

സിബിഐയുടെ വാദം തള്ളണമെന്നും തുടരന്വേഷണം നടത്തണമെന്നും ആവശ്യപ്പെട്ട് നാരായണന്‍ നമ്പൂതിരിയുടെ സഹോദരന്‍ ഉണ്ണികൃഷ്ണന്‍ നമ്പൂതിരിയും ക്രൈം വാരിക എഡിറ്റന്‍ നന്ദകുമാറുമാണ് കോടതിയെ സമീപിച്ചിരുന്നത്. അനഘയെ അച്ഛന്‍ പീഡിപ്പിച്ചതിന് ശാസ്ത്രീയമായ തെളിവുകള്‍ ഇല്ലെന്ന് വ്യക്തമാക്കിയിരുന്ന സിബിഐ അനഘയുടെ കൂട്ടുകാരികളുടെ മൊഴിയനുസരിച്ചാണ് ഇക്കാര്യം കണ്‌ടെത്തിയതെന്നും വ്യക്തമാക്കിയിരുന്നു. 2004 സെപ്തംബര്‍ 28 നാണ് കവിയൂര്‍ ക്ഷേത്രത്തിന് സമീപം താമസിച്ചിരുന്ന ക്ഷേത്രപൂജാരി കെ.എ. നാരായണന്‍ നമ്പൂതിരി, ഭാര്യ ശോഭന, മക്കളായ അനഘ (15) അഖില (7) എന്നിവരെ ജീവനൊടുക്കിയ നിലയില്‍ കണ്‌ടെത്തിയത്.